2Sa 5 | ZomZIV | STEP | Israel behte khempeuh Hebron a David kiangah pai uh a, “Kote nangma si le sa ka hi uh hi.

2 Samuel 5

David, Israel Kumpi Suak

1 Israel behte khempeuh Hebron a David kiangah pai uh a, “Kote nangma si le sa ka hi uh hi. 2 A beisa hunin kote tungah Saul kumpi ahi lai-in Israel galsimna ah a makai nangmah na hi hi. Tua hi-a TOPA in nang tungah, ‘Ka mi Israel na cing dinga amaute ukpa na hi ding hi,’ hong ci hi,” a ci uh hi.

3 Israel upate khempeuh Hebron a kumpi David kiangah a pai uh ciangin kumpipa in amaute tawh Hebron a TOPA mai-ah kithu-khatna bawl uh a, amaute in Israel tungah kumpi dingin David sathau a nilh uh hi. ^a

4 David kumpi a suahin kum sawmthum pha a, kum sawmli sung a uk hi. 5 Hebron ah Judah kum sagih le khaguk sung uk a, Jerusalem ah Israel khempeuh le Judah kum sawm thum le thum sung a uk hi. ^b

David in Jerusalem Zo

6 Kumpipa le a mite, tua lai-a teng Jebus-te sim dingin Jerusalem lamah a kuan uh hi. Jebus-te in David kiangah, “Hih lai-ah nong lut zo kei ding hi; mittawte le khebaite nangawn in nang hong nang zo ding uh hi,” a ci uh hi. Amaute in, “Hih munah David a lut zo kei ding hi,” ci-in a ngaihsun uh hi. 7 Ahi hangin, David in mun muanhuai Zion David khuapi a la hi. ^c

8 Tua ni-in David in, “Jebus-te a zo peuhmah in David galte ^{▼▼5.8 Ahikeh David muhdahte} ahi ‘mittaw le khebaite’ omna mun a tun nadingun tuidum ^{▼▼5.8 Ahikeh tehna sikkawi zangin.} a zang ding uh hi,” ci hi. Tua hangin amaute in, “Tua mittaw le khebaite kumpi inn sungah a lut kei ding uh hi,” ci uh hi.

9 Tua ciangin kulh sungah David tenga, David Khuapi kici hi. Amah in a kimkotah huang neisaka, a kipsak nadingin a sunglam ah leicial ^{▼▼5.9 Ahikeh Millo} a neisak hi. 10 TOPA Thahatpen Pasian in ompih ahi manin amah a vanglian semsem hi. ^g

11 Tu-in Tyre kumpipa Hiram in David kiangah kamtai sawla, tam-taak luangte le khutsiamte le leisek siamte tonpihsak a, amaute in David adingin kumpi inn a lam uh hi. 12 Tua ciangin David in Israel kumpi dingin TOPA in amah kipsaka, ama mi Israel a khualna-in a kumpi-gam tawisang hi, cih a thei hi. ^h

13 Hebron a nusiat khitin David in Jerusalem ah zi le zino lak thuah lai-a tanu tapa a neih thuah lai hi. 14 Tua lai-a a neih a tate min in: Shammua, Shobab, Nathan, Solomon, 15 Ibhar, Elishua, Nepheg, Japhia, 16 Alishama, Eliada le Eliphelet ahi hi.

David in Philistia-te Zo

17 Israel kumpi dingin David sathau a kinilh lam Philistia-te in a zak uh ciangin a galhatna khempeuh uh tawh amah zong dingin a kuanto uh hi; ahi hangin David in na za-a a mun muanhuai ah a paisuk hi. 18 Phisliatia-te kuansuk ta uh a, Rephaim Kuam ah a kiphalh uh hi; 19 tua ciangin David in, “Pai-in Philistia-te ka sim ding hiam? Amaute kei khutah nong pia ding hiam?” ci-in TOPA a dong hi.

TOPA in, “Kuan in, Philistia-te na khutah kong pia taktak ding hi,” ci-in a dawng hi.

20 Tua ciangin Baal Perazim ^{▼▼5.20 Baal Perazim pen a phukham topa cihna} ah David kuan a, tua lai-ah amaute a zo hi. Amah in, “Tui phutkhap bangin ka mai-a ka galte TOPA in hong phutkhapsak hi,” a ci hi. Tua ahi ciangin tua mun Baal Perazim kici hi. 21 Philistia-te in tua lai-ah a milimte uh taisan uh a, David le a mite in a puakhia uh hi. ^j

22 Philistia-te khatvei va kuanto kik uh a, Rephaim Kuam ah a kiphalh uh hi; 23 tua ciangin David in TOPA donga amah in, “Tang takin paito kei in, amau nung kimkotin um unla lungli kungte maisan panin sim un. 24 Lungli kungte dawnah lampaina ging na zak phetun manlangin kuan un, bang hang hiam cih leh tua in Philistia-te galkapte vat dingin TOPA kuan khin hi, cihna ahi hi,” ci-in a dawng hi. 25 Tua ciangin TOPA thupiak bangin David in hih a, Gibeon ^{▼▼5.25 Septuagint (1Kh.14:16 zong en in) Hebrew in Geba} panin Gezer dong lam dung tengah Philistia-te a sattuk hi. ^l